මටත් මහන්සි දැන් නම්!

ඉවර නැතුව කියවන නුඹෙ
වචන ගිහින් දුර ගමනක්
ලෝබ නැතුව බෙදල දීපු
හිනාවෙ සායමත් ගිහින්
මොනව වෙලාදැයි හිතලම
මටත් මහන්සි දැන් නම්!

වෙනස් වෙයන් නුඹ..

ස්නේහයේ තනුව
නුඹට නොරිසි ව
වැයෙන මුත්
අකීකරු සිත,
වෙනස් වෙයන් නුඹ
තනුවට රිසි ලෙස..
නොසොයනු මැන
වාදකයකු,
නුඹට රිසි ලෙස වයන්නට හැකි..

එනකම් මඟ බලා ඉඳ

අතගා තුටු පහටු වී

හාංකවිසියක් නොකියාම

මා හැර නික්ම යන

මගේ අසරණ

පඩිය..

මා ළබැඳියා
මල් කුඩයක් සෙවනේ ඉඳ
දොඩමලු වී මාත් එක්ක
දෙපා නගයි ඈ තාලෙට..

..........

 හත්දින්නත් තරු පොකුරක

එක් තරුවක අතරමංව
යදමින් බැඳි වරා මලක
හිතුවක්කාර සිතිවිල්ල..
අමතකව කෙලිලොල් මලට
ගිලිහි ගිය කලෙක නටුවෙන්
ඉමක් කොනක් නොමදැක
නැවතිල්ලක් නොමදැන
පාව යන්නට වෙන වග..

අධිවේගී බස් මගිච්චි

ගෙදර උයපු බත් කටක් කන්න
ඉක්මනට ගෙදර එන්න
ආවෙමි
ආශ්චර්යමත් අධිවේගයේ..
බඩුමල්ලේ බර බල බල
උස අඩියට දෙස් තිය තිය
සුව වින්දෙමි
කෙලවරක් නැති පෝලිමේ..
හිරි පොද ඔච්චම් කරද්දි
'මහරගම-ගාල්ල' විතරක් එද්දි
සිරි වින්දෙමි
ගාල්ලට විතරක් ආශ්චර්යයේ..
 

අපරාදෙ ටුක් එකට දීපු සල්ලි!

මලී..

හිනැහෙන දොඩවන මිතුරිය සොයුරිය
පිච්ච මලී..
සමනල් හදවත සලිත කලී ඈ
රෝස මලී..

නෙතඟ බැලුම් කෝල සිනා
පා නගනා උකුල සලා
මුදු වදනින් කැලුම් ගෙනා
සමනල සිත උමතු වෙලා

පිච්ච මලී ඈ සොයුරී..
රෝස මලී ඈ සොඳුරී..

පිච්ච මලී ළඟ නොඉඳින්
සිත් බිඳුනී රෝස මලී
පිච්ච මලී ඈත් වෙයන්
දුක සිතුනී මිතුරු මලී

පිච්ච මලී ඈ සොයුරී..
රෝස මලී ඈ සොඳුරී..